facies quoque altare in adolendum thymiama de lignis
setthim
habens cubitum longitudinis et alterum latitudinis id est
quadrangulum et duos cubitos in altitudine cornua ex ipso
procedent
vestiesque illud auro purissimo tam craticulam eius quam
parietes per circuitum et cornua faciesque ei coronam aureolam
per gyrum
et duos anulos aureos sub corona per singula latera ut
mittantur in eos vectes et altare portetur
ipsos quoque vectes facies de lignis setthim et inaurabis
ponesque altare contra velum quod ante arcam pendet
testimonii coram propitiatorio quo tegitur testimonium ubi
loquar tibi
et adolebit incensum super eo Aaron suave fraglans mane
quando conponet lucernas incendet illud
et quando conlocat eas ad vesperum uret thymiama
sempiternum coram Domino in generationes vestras
non offeretis super eo thymiama conpositionis alterius nec
oblationem et victimam nec liba libabitis
et deprecabitur Aaron super cornua eius semel per annum in
sanguine quod oblatum est pro peccato et placabit super eo in
generationibus vestris sanctum sanctorum erit Domino
locutusque est Dominus ad Mosen dicens
quando tuleris summam filiorum Israhel iuxta numerum
dabunt singuli pretium pro animabus suis Domino et non erit
plaga in eis cum fuerint recensiti
hoc autem dabit omnis qui transit ad nomen dimidium sicli
iuxta mensuram templi siclus viginti obolos habet media pars
sicli offeretur Domino
qui habetur in numero a viginti annis et supra dabit
pretium
dives non addet ad medium sicli et pauper nihil minuet
susceptamque pecuniam quae conlata est a filiis Israhel
trades in usus tabernaculi testimonii ut sit monumentum eorum
coram Domino et propitietur animabus illorum
locutusque est Dominus ad Mosen dicens
facies et labium aeneum cum basi sua ad lavandum ponesque
illud inter tabernaculum testimonii et altare et missa aqua
lavabunt in eo Aaron et filii eius manus suas ac pedes
quando ingressuri sunt tabernaculum testimonii et quando
accessuri ad altare ut offerant in eo thymiama Domino
ne forte moriantur legitimum sempiternum erit ipsi et
semini eius per successiones
locutusque est Dominus ad Mosen
dicens sume tibi aromata prima et zmyrnae electae
quingentos siclos et cinnamomi medium id est ducentos
quinquaginta calami similiter ducentos quinquaginta
cassiae autem quingentos siclos in pondere sanctuarii olei
de olivetis mensuram hin
faciesque unctionis oleum sanctum unguentum conpositum
opere unguentarii
et ungues ex eo tabernaculum testimonii et arcam
testamenti
mensamque cum vasis suis candelabrum et utensilia eius
altaria thymiamatis
et holocausti et universam supellectilem quae ad cultum
eorum pertinent
sanctificabisque omnia et erunt sancta sanctorum qui
tetigerit ea sanctificabitur
Aaron et filios eius ungues sanctificabisque eos ut
sacerdotio fungantur mihi
filiis quoque Israhel dices hoc oleum unctionis sanctum
erit mihi in generationes vestras
caro hominis non unguetur ex eo et iuxta conpositionem
eius non facietis aliud quia sanctificatum est et sanctum erit
vobis
homo quicumque tale conposuerit et dederit ex eo alieno
exterminabitur de populo suo
dixitque Dominus ad Mosen sume tibi aromata stacten et
onycha galbanen boni odoris et tus lucidissimum aequalis
ponderis erunt omnia
faciesque thymiama conpositum opere unguentarii mixtum
diligenter et purum et sanctificatione dignissimum
cumque in tenuissimum pulverem universa contuderis pones
ex eo coram testimonio tabernaculi in quo loco apparebo tibi
sanctum sanctorum erit vobis thymiama
talem conpositionem non facietis in usus vestros quia
sanctum est Domino
homo quicumque fecerit simile ut odore illius perfruatur
peribit de populis suis
